Data types

Dasturlash tillarida ma'lumotlar bir necha turlarga bo'linib, ular ustida turli xil amallar bajariladi.

Masalan, 5, 12, 90 lar butun sonlar, 4.5, 8.97, 0.123 kasr sonlar va boshqalar.

Ma'lumotlarni bir necha turlarga ularning ko'rinishi, matematik xossasi va boshqa faktorlariga qarab ajratamiz.

Pythonda ma'lumotlar int, float, str, bool, list, tuple va boshqa bir necha turlarga bo'linadi.

int ma'lumot turi

int toifasiga barcha butun sonlar kiradi. Masalan,

a = 456

b = -97

456 butun son bo'lgani uchun uning toifasi int bo'ladi. 456 soni a o'zgaruvchisining qiymati bo'lgani uchun a o'zgaruvchisining toifasi ham int bo'ladi. Xuddi shunday, -97 uchun ham b o'zgaruvchisining toifasi int bo'ladi.

float ma'lumot turi

float toifasiga barcha kasr sonlar kiradi. (Oddiy qilib aytganda, nuqta ishtirok etgan sonlar)

a = -6.7

b = 9.0

Bu yerda a va b o'zgaruvchilarining toifalari float bo'ladi.

9.0 sonining kasr qismi bo'lmasa ham pythonda bu son float hisoblanadi.

str ma'lumot turi

str toifasiga matnli ma'lumotlar kiradi. (Oddiy qilib aytganda qo'shtirnoq ichida yozilgan ma'lumotlar)

a = "Hello"

b = 'Asliddin'

c = "12"

Bu yerda a, b va c o'zgaruvchilarining toifalari str bo'ladi.

12 soni aslida int toifasiga kirishi kerak. Lekin bu yerda qo'shtirnoq ichiga olingani uchun python "12" ni str deb hisoblaydi.

str so'zi string so'zining qisqartmasi.

bool ma'lumot turi

bool toifasiga True va False qiymatlari kiradi.

a = True

b = False

bool toifasiga batafasil keyingi darslarda to'xtalamiz.

O'zgaruvchining toifasini qanday aniqlash mumkin?

O'zgaruvchining toifasini, ya'ni qaysi ma'lumot turiga kirishini type funksiyasi orqali aniqlash mumkin.

a = "New"

print(type(a))

Natija

<class 'str'>

Bundan a o'zgaruvchisining toifasi str ekanligi kelib chiqadi.

Ma'lumot turlarining to'liq ro'yxati bilan bu yerda tanishib chiqishingiz mumkin.